रुकुमपूर्वको सिंचाइ कार्यालयद्वारा नयाँ योजनाको काम अझै सुरसार छैन्

जलस्रोत तथा सिंचाइ विकास सवडिभिजन कार्यालय रुकुमपूर्वले यस आर्थिक वर्षको नयाँ योजनाको काम अझै सुरु गरेको छैन् । ठेक्का मार्फत कार्यन्वयन हुने योजनाको हाल सम्म पनि कार्यालयले ठेक्का आह्वान गर्न नसक्दा नयाँ योजनाका काम सुरु हुन नसकेको हो ।

कार्यालयले तोकिएको समयमा ठेक्का प्रक्रिया अघि बढाउन नसक्दा सिंचाइ योजना अलपत्र अवस्थामा परेको स्थानीयले बताएका छन् । सिंचाइ कार्यालय अन्तर्गत सञ्चालनमा आउनुपर्ने योजनाहरुको काम सुचारु नहुँदा स्थानीय आक्रोशित छन् ।

कार्यालयका कर्मचारीले योजना कार्यन्वयमा चासो नगर्दा यस आर्थिक वर्षको ९ महिना बितिसक्दा समेत काम शुन्य गतिमा रहेको भन्दै भूमे गाउँपालिका–२ का वडाध्यक्ष नारायण पुनले आक्रोश पोख्नुभयो । अझै पनि कार्यालयले आफ्नो काम सुरु नगरे आन्दोलनमा समेत जाने वडाध्यक्ष पुनले बताउनुभयो । वडाध्यक्ष पुनले जलस्रोत तथा सिंचाइ विकास सवडिभिजन कार्यालयका प्रमुख मदनप्रसाद शाहलाई कार्यालयको काम किन ढिलासुस्ती भयो भनेर बुझ्दा प्रमुख शाहले रिसाएर बजेट फ्रिज गएमा जिम्मा म लिन्छु भन्नु भएको बताउनुभयो । प्रमुख शाहले थप यस विषयमा तपाईलाई किन चासो भयो ? भनेर आफूलाई शाहले उल्टो प्रश्न गरेको वडाध्यक्ष पुनले बताउनुभयो ।

सिंचाइ कार्यालय प्रमुख मदनप्रसाद शाहले रुकुमपूर्वको पुथाउत्तरगंगा गाउँपालिकाको उपनिर्वाचनले एक महिना कार्यालयमा काम हुनु नसकेको बताउनुभयो । यस कार्यालयमा कर्मचारीहरु सरुवा भएर जादा काममा ढिलाइ भएको शाहले बताउनुभयो । प्रमुख शाहको अनुसार प्राविधिक तथा प्रशासनिक कारणले टेन्डर खोल्न ढिलाइ भएको बताउनुभयो । अब छिट्टै काम सुरु गर्ने शाहले बताउनुभयो । केही कारण बस यस आर्थिक वर्षको बजेट फ्रिज गएको खण्ड आफैँ जिम्मेवारी हुने समेत प्रमुख शाहले बताउनुभयो ।