अ) सेराबाङ तामाखानी

भूमे गाउँपालिकाको वडा नं. ३ को झुम्लाबाङ, वडा नं. ४ को काँडा र वडा नं. ५ को सेराबाङ भौगोलिक रुपमा एकैपट्टि रहेको छ। जनश्रुति अनुसार झुम्लाबाङको खानीमा छिरेको मानिस सेराबाङको मछैनामा निस्कन्छ। अर्थात्, झुम्लाबाङदेखि काँडा हुँदै सेराबाङसम्म तामाखानीको सिलसिलेवार रहेको भनाई स्थानीय बुढापाकाको छ। झुम्लाबाङ र काँडामा जस्तै सेराबाङका जङ्गलहरुमा पनि आजभन्दा करिब ३०० वर्ष पहिलेसम्म निकालिएका तामाखानीका सुरुङ र धाउ खारेको ढुङ्गा देख्न पाइन्छ। तामाखानीले परिचित सेराबाङको अर्को परिचय मिलेको गाउँ अनि हरिया बारीका पाटाहरु हुन्। रुकुमकोटको नजिकै पर्ने सेराबाङ, साकिमलाई कृषि पर्यटनको रुपमा समेत विकास गर्न सकिने सम्भावना रहेको छ।